CHE ES QUE?
Cultura da las muntagnas illas muntagnas
Que es il festival da cultura illa val chi'd es "auncha la pü bella val da las muntagnas", scu cha Andrea Zogg l'ho numneda. Fundos dal 2014 da Lorenzo Polin ed Andrea Gutgsell, sun ils "Dis da cultura da Samedan" (da quel temp) dvantos güst dal principi davent ün success! La tribüna es adüna bain occupeda cun indigens e giasts, perque cha'l scharm da las muntagnas do üna speciela nota da giodimaint a l'ambiaint artistic.
ARTISTS NAZIUNELS
Excellents artists svizzers
Na be ad Andreas Thiel (purtret survart) vainsa pudieu bivgnanter sün nos palc davaunt la Chesa Planta, dimpersè eir a bgeras otras corifeas da la scena svizra d'art: Andrea Zogg, Claudio Zuccolini, Arno Camenisch, Rolf Schmid, Rob Spence …
ANDREA ZOGG (SCHNESTRA) CULLA BAND “VOLKSSCHNUSIG” - DIS DA CULTURA 2015
ROLF SCHMID “ROLF XXL” - DIS DA CULTURA 2016
CLAUDIO ZUCCOLINI “WARUM?” - DIS DA CULTURA 2017
ROB SPENCE “MAD MEN” - DIS DA CULTURA 2018
ARNO CAMENISCH “LIEST - DIE LAUNEN DES TAGES” - DIS DA CULTURA 2017
RAPRESCHANTAZIUNS INDIGENAS
(Promoziun da) Cultura regiunela
Nus Engiadinais essans superbis d'avair üna lungia tradiziun da teater (rumauntsch). Numerusas societeds dramaticas - saja que da laics u da profis - rapreschaintan ils pü differents geners da töchs, formats e cuntgnieus. La multifarieted dal chantun Grischun nu's muossa be in sieus 150 vals e muntagnas, dimpersè eir sün nos palc.
Rene Schnoz
Naschieu dal 1966 e creschieu sü a Mustér/Disentis illa Surselva rumauntscha, ho René Schnoz frequento la scoula commerciela a Cuira e zieva absolt l'Academia d'actuors da Turich. El es sto sün nos palc als DIS DA CULTURA 2015 i'l töch “Las Flurs dil di” dad Arno Camenisch. „Eau stögl der tiers sainz'invilgia cha l'Engiadina am plescha auncha meglder cu la Surselva. Per la peja vains nus ad Arno Camenisch.“
Societed Dramatica
Chi nu vuless üna vouta vzair a sieus conabitants sül palc e rir cun els? Per rinfurzer la cumünaunza in giuvand, per uschè dir. La Societed dramatica da Samedan renda que pussibel. E nus ans allegrains adüna darcho da vzair a giuver a vegls laics ed ad actuors in visita. Natürelmaing adüna in rumauntsch!
Myriam Gurini
Creschida sü in Engiadina, lavura Myriam Gurini hoz scu ballarina, coreografa e pedagoga da sot independenta. Zieva sia furmaziun da pedagoga da muvimaint a la Scoula da diplom per gimnastica da Basilea ho ella absolt la scolaziun da sot a la Scoula da sot contemporauna Varium a Barcelona. Pel festival da cultura Dis da cultura in Engiadina ho ella realiso töchs da teater suto, e que culla societed DRAUFF scu coreografa e ballarina
Arno Camenisch
L'autur e performer grischun Arno Camenisch ho let als DIS DA CULTURA 2017 our da sia ouvra “Las Flurs dil di” ed ho medemmamaing contribuieu cun sieus text al festival dal 2015. El es cuntschaint scu autur ed artist dal spoken word - na be illa regiun, ma eir sül palc naziunel.
INUA HO LÖ IL FESTIVAL DIS DA CULTURA?
Samedan & Engiadin'Ota
Dal 2014 al 2018 es la chesa patriziauna Chesa Planta i'l center da Samedan - la chapitela da l'Engiadin'Ota - steda la dmura da nos festival. La tribüna fatta aposta per nos festival spordschaiva üna vista perfetta sülla culissa cun scharm istoric. Uossa vaun ils DIS DA CULTURA nouvas vias, ed uschè varon lö las rapreschantaziuns eir in oters lös da l'Engiadin'Ota.
“Ils DIS DA CULTURA dessan spordscher üna plattafuorma a talents regiunels e locals, pussibilter barats cun oters artists e cultiver la cultura in nossa bella regiun.”
La vappa da la societed
La societed DIS DA CULTURA
Dal 2014, cur cha'l festival da cultura DIS DA CULTURA DA SAMEDAN ho aviert sias portas, suottastaiva l'organisaziun e la respunsabilted dal festival al collectiv artistic DRAUFF. Intaunt sun ils dis da cultura dvantos ün'occurrenza independenta da DRAUFF. Els spordschan als actuors da DRAUFF però regulermaing üna plattafuorma per lur rapreschantaziuns e per la preschantaziun da lur egnas producziuns. Cò as chatta üna retrospectiva dals DIS DA CULTURA DA SAMEDAN dals 5 ans passos.
Ils Dis da cultura da Samedan haun uossa be pü nom DIS DA CULTURA. Il motiv per que es il fat cha nus vains schlargio il festival sün oters lös in Engiadin'Ota, cha rapreschantaziuns varon dimena lö eir utrò.